Mikel Arteta Oo Ka Hadlay Fursadaha Arsenal Ee Premier League

October 22, 2025

⸻

Tababaraha kooxda Arsenal, Mikel Arteta, ayaa si deggan uga jawaabay su’aal ku saabsan fursadaha kooxdiisu ku hanan karto horyaalka Premier League, isaga oo diiday in Gunners loo aqoonsado kooxaha ugu cadcad ee hanan kara koobka.

Kooxda Arsenal ayaa haatan hoggaanka u haysa horyaalka iyadoo saddex dhibcood oo nadiif ah ku qabta kaalinta koowaad, kaddib guushii ay 1–0 kaga adkaadeen Fulham, iyo guuldarradii Liverpool ay 2–1 kala kulantay Manchester United garoonka Anfield.

Tan iyo markii ay ka soo gaartay guuldarro Liverpool bishii Agoosto, Arsenal lagama adkaan shan kulan oo xiriir ah horyaalka Premier League, halka ay guud ahaan siddeed kulan oo tartamada oo dhan ah soo bandhigeen qaab ciyaareed heer sare ah.

Natiijooyinkaas ayaa sababay in dad badani aaminaan in kooxda uu hoggaamiyo Arteta ay yihiin musharraxiinta ugu cadcad ee hanan kara horyaalka xilli ciyaareedkan. Si kastaba ha ahaatee, tababaraha reer Spain ayaa doonaya in kooxdiisu aysan ku degdegin ama isku kibrin.

Isagoo la hadlay saxaafadda ka hor kulanka Champions League ee ay la ciyaarayaan Atletico Madrid, Arteta ayaa yiri:

“Waxa kaliya ee aan qirayaa waa marka aan arko kooxda, tamarta, dadaalka iyo tayada ay garoonka keenayaan. Taasi waxay i siisaa kalsooni ah in aan gaari karno meel sare.
Laakiin waa dareen kaliya – ciyaar kasta waa inaad dib u caddeyso awooddaada. Ma aha inaad maskaxda ku mashquuliso hadalka dadka ama rajada banaanka.”

Arteta ayaa sidoo kale ku adkaystay in kooxdiisu aysan oggolaan doonin kibir ama isku filnaansho, isagoo sheegay in Arsenal ay diiradda saareyso ciyaar kasta si ay u sii joogteeyaan guulaha.

“Ciyaar kasta oo horyaalka ah waa mid muhiim ah. Waxaan si buuxda u ognahay in guul kasta ay naga dhoweynayso yoolkeena, sidaas darteed ma oggolaaneyno inaan meel fog ku orodno.”

Leave a comment Cancel reply

Lionel Messi oo Inter.

Mikel Arteta Oo Farta.

🌎 HERE WE GO!.